ام محمد: وموزة شو قالت؟.
بومحمد: البنت قبل ابوها شاورها وقالت إنها موافقة بس انا قلتلهم إني أريد ارمسها شدراني يمكن أهلها يغصبونها عليه, رمستها وقالتلي الشور شور أهلها قتلها أهلج موافقين وقالت وهي بعد.
سلامة بصوت عالي: مبرووك يا محمد مبروك.
ام محمد: حسبي الله عليج شو فيج ينييتي.
سلامة تضحك: هييه, اماية بموت من الفرح لخوي والله فرحانة من الخاطر, ابوية قلت لمحمد.
بومحمد: لا بعدني ما خبرته باجر بخبره.
سلامة: ابويه ارجوك انا أريد اخبره أرجوك.
بومحمد يضحك: هاهاهاههاها خلاص انتي خبريه.
سلامة: مشكور أبويه.
باست ابوها ع راسه وراحت فوق عند روضة وخالد تخبرهم وفرحو لخوهم وايد.
وعلى الساعة 12 مارامت سلامة تصبر واتصلت بمحمد.
محمد: ألو.
سلامة: أهلين محمد, رقدت؟.
محمد: على وشك فيه شي.
سلامة: لا ما شي, بس أخاف أقولك شي وما ترقد.
محمد بخوف: قولي لا تخافين اصلا انا تعبان وفيني ارقاد.
سلامة تضحك: مبروك موزان وافقت.
قام محمد من على الشبرية: قولي والله.
سلامة تضحك: هاهاههاهاهاهاااا والله.
محمد: ابوي ما اتصلبي انتي شدراج؟.
سلامة: ابوي حملني مسؤولية إني أخبرك وعاد أنا ما قدرت اصبر لين باجر.
محمد: سلامي صدق وافقت؟.
سلامة: هييه صدق, ابويه قالي إن هو رمس ابوها وخوانها ووافقو عليك وابوي بعد رمس موزة و هي بعد وافقت.
محمد: سلامي تراه هذا موضوع ما يمزحون فيه.
سلامة: وانا ما مزح وياك, ألف ألف مبرووووك يا الغالي.
محمد بشك: سلامي صدق ابوي رمسها ووافقت؟.
سلامة:هييه صدق والله العظيم إنها وافقت.
قعد محمد على الشبرية وهو يتنهد من الخاطر: أخيرا يا سلامة والله كنت خايف ما توافق.
سلامة: أنا قتلك إنها بتوافق وصح مريوم تقولك ألف مبرووك.
محمد: الله يبارك فحياتكن وعقبالكن إن شاء الله.
سلامةً: إن شاء الله يلا محمد سير ارقد وتصبح على خير.
محمد: وانتي من اهل الخير, مع السلامة.
سلامة: باي.
وانسدح محمد وهو مب رايم يرقد الرقاد طار من عيونه من بعد هذا الخبر ومن كثر فرحته يبى يصارخ ويقول للكل إنه يحبها وتم ع طول الليل يفكر فيها ويذكر أيام قبل, أما موزة فكانت نفسه مب رايمه ترقد تحس كل إللي يستويلها حلم وتخاف وتقوم من الحلم ويكون كل شي انتهى وتمت على هذا الحال لين ما سمعت إذان الفير صلت وعقب رقدت.
و بالباجر نشت سلامة الساعة 10 ونزلت تسلم على أهلها.
سلامة: صباح الخير ابويه صباح الخير امايه.
بومحمد وام محمد: صباح النور.
ام محمد: سلامي قومي شوفي اختج إذا تبى ريوق.
سلامة: جيه روضان ماداومت اليوم.
بومحمد: لا تقول إنها تعبانة.
ام محمد: حليلها هي صدق تعبانة ما تشوفها شقايل غدت سوط مرة ما تاكل.
بومحمد: محد قالها ما تاكل الحمدلله الأكل موجود.
ام محمد: سلامي روحي شوفيها.
سلامة: إن شاء الله أماية الحين بروح أشوفها.
راحت سلامة عند روضةودقت الباب بس روضة ما ردت عليها.
سلامة: رويض ممكن تفتحيلي الباب.
بطلت روضة الباب وردت تقعد فوق الشبرية ومنزله راسها.
سلامة: رويض حبيبتي شو فيج؟.
روضة: ما فيني شي.
سلامة: كيف ما فيج شي وانتي تصيحين؟.
روضة: ما فيني شي بس راسي يعورني ومارمت ارقد من أمس.
سلامة:خذتي بندول؟.
روضة: هييه خذت ماشي فايدة.
سلامة: ليش ما وعيتيني.
روضة: ما حبيت اسببلج إزعاج قلت بخذ بندول وبيروح العوار.
سلامة: رقديانتي الحين لين ماروح اسويلج شي يهدي راسج.
روضة: إن شاء الله.
راحت سلامة عند امها وخبرتها إن روضة راسها يعورها عاد امها راحت تسويلها شي من خلطاتها السحرية وبعد ما خلصت راحت عند روضة ولقت روضة تصيح.
ام محمد: رويض ليش تصيحين؟.
روضة وهي تصيح: اماية راسي يعورني بس.
ام محمد: خذي هذا شربيه كله ولا تخلين شي فيه ومابى ألقى قطرة وحده فيه, وراسج يعورج مب من شي من قل الأكل صارلج اسبوعين ما تاكلين شرات العالم والناس, شربي هذا لين ما أرجع بروح أييبلج شي تاكلينه.
روضة: اماية مشكورة والله ماريد ما شتهي الحين شي.
ام محمد: كيف ماتبين راسج يعورج وانتي ما اطيعين تاكلين كل ما اقولج كلي تقوليلي ما شتهي تراج غربلتيني.
روضة: امايه وعد من احس بيوع بنزل أكل بس الحين أريد أرقد.
ام محمد: انا بخليج الحين ترقدين بس بعدين لازم تنزلين تاكلين انزين.
روضة: إن شاء الله امايه.
طلعت ام محمد عن روضة وردت روضة تنسدح على الشبرية وصاحت ما تقدر ترقد تحس إنها بتموت خلاص تعبت ماتقدر تتحمل أكثر من جيه بس ما تقدر تقول لحد وتمت تصيح لين ما رقدت من التعب.
أما سلامة فراحت تتصل بمريم, اتصلت سلامة ببيت عمها منصور ومحد رد عليها واتصلت مرة ثانية وكانت بتسكر لكن ردو عليها.
جينا: الوه.
سلامة: السلام عليكم.
جينا: وعليكم سلام و رهمة الله وبركاته.
سلامة: شحالج جينا.
جينا: تمام كيف هال انتي ماماه سلامة.
سلامة: هاهاهاههاها الحمدلله بخير وين مريم.
جينا: انا ما في معلوم ممكن هي في نوم.
سلامة: سيري وعيها وقوليلها تتصلبي ضروري انزين.
جينا: جين ماما سلامة.
سلامة: باي.
سكرت سلامة وهي تكلم نفسها: مالت عليج يا جينا الحين انا ماماه.
ام محمد: انتي منو ترمسين.
سلامة: ارمس نفسي.
ام محمد: بسم الله لا يكون ينييتي.
سلامة: لا اماية لا تخافين بعدني ما ينييت بس هاي عادة ما قدر اخوزها.
ام محمد: يا الله محد يرمس نفسه إلا الميانين, روحي شوفي اختج رقدت وإلا بعدها تعبانة.
سلامة: إن شاء الله.
راحت اتشوف روضة ولقتها راقدة وردت تقعد مع امها فالصالة وكانت الساعة 11.
ام محمد: شو ختج الحين.
سلامة: راقدة.
ام محمد: الحمدلله يوم رقدت والله ماعرف شو بلاها هاي البنت من ثلاث اسابيع وهي مش على بعضها.
سلامة: لا تخافين اماية عليها هذا شويت إرهاق يبالها ترتاح شوي.
ام محمد: ومن شو هذا الإرهاق هي بعدها صغيرة على الإرهاق والتعب.
سلامة: اماية هذا كله من قل الرقاد والأكل.
ام محمد: يوم أقولها لا تسهرين لا تسهرين ما ييبها الكلام تحب تعاند تشوف الحين شو فادها السهر.
سلامة: خلاص أماية انتي لا تحاتين بتقوم بعد ساعتين وبتشوفينها بخير إن شاء الله.
ام محمد: إن شاء الله بس إذا تمت على ها الحال بسيربها المستشفى يشوفون بنتي شو بلاها.
سلامة: وانا بسير وياج, صح اماية تراني خبرت محمد.
ام محمد: متى خبرتيه.
سلامة: أمس اتصلتبه وخبرته إنهم وافقو.
ام محمد: غربلاتج ما صبرتي لين ما يوصل العين.
سلامة: والله اماية ماقدرت اصبر بس لو سمعتي صوته أمس بعد ما خبرته حسيته فرحان واايد وبطير من الفرح
الأربعاء فبراير 10, 2010 8:40 am