غايب حبيبي وين؟؟ مدري وش اللي صار
منهو يعلمني؟؟ انقطعت الاخبــار
ودي اشوفه يووم..واعرف عن احواله
يمكن مرض فجأه ولاتعب حاله...
خلصت ساره امتحانات الفصل الاول..وكنت متلهفه على آخر يووم لانه سعيد قال لها انه بيرمسها عقب ماتخلص امتحانات..بس هي سالته في اخر اتصال وخبرها انه بيخلص امتحانات عقبها باسبووع.. المهم دقت له في اخر يووم مره ومرتين مارد..قالت اكيد مشغول ولا يدرس.. وقررت ادقله في يوم ثاني.. عقب جم يووم ردت دقتله بعد مايرد عليها .. طرشت له مسج تبي تطمن عليه مارد..خافت عليه وايد وتمت تحاتيه وعقب اسبوع ردت دقت له.. وصللها مسج:سعيد مسافر وانا ربيعه ومخلي تلفونه عندي بيرد بعد جم يوم ان شاء الله.. صدقت ساره انه مسافر رغم انها كانت زعلانه لانه ماخبرها قبلها بس عذرته لانها حطت في بالها انها سفره ضروريه..
خطفن اسبوعين وساره مادقت.. بس يوم قررت ادقله كانت متأكده انه بيرد عليها لانه اكيد رد من السفر لانه ربيعه كاتب انه بعد جم يوم بيرد.. دقت وللاسف خاب ظنها محد يرد..مره مرتين ثلاث .. no answer.. ساره يتها كل الاحتمالاات في بالها.. تعبان؟؟ ولا بعده مسافر؟ ولا استوابه شي؟؟... اخر احتمال واللي مافكرت فيه الا بس ثانيه انه هو مايباها.. بس مستحيل كان يرمسني عدل ومازعلته ولاغلطت عليه بشي.. طرشت له مسج مسجين 3 4..وماشي رد..
طرشت له ايميل قالت يمكن هو يحدر النت وع الاقل يطمني وماشي امل لا ايميل ولا مسجات ولا رد ع التلفوون..
رد علـي محتـاج ( صوتـك ) دقيـقـه
رد علـي لاتحرمنـي مـن الـصـوت
صوتـك يبـدّد داخـلـي كــلّ ضيـقـه
يحييني لو أنّه مثل ../ رعشة الموت ....!!!
كان اخر مسج طرشته ساره حق سعيد.. بس مارد.. 6 شهور تمت ساره على هالحال ماتعرف كيف توصله وهي متولهه عليه وبنفس الوقت تحس انها مجروحه..
مسكينه ماتدرين.. هذا يكلمني
يسهر معاي الليل وده يبعثرني
خطفن 6 شهور وساره ماتعرف عنه شي.. ساره خلصت امتحانات اخر السنه ونجحت وبتسير ثالث ثانوي.. اجازة الصيف كانت بدايتها ممله كله كانت تحدر المسن ومعظم وقتها تكون راقده..مره كانت سهرانه ع المسن وتسمع اغاني .. شوي حد يرمسها واستغربت انه ايميل سعيد.. استانست وااايد ومن الفرحه تم قلبها يدق.. ماعطته مجال يرمس بس تمت تساله وينك انا احاتيك..
رد بكل برود: انتي تعرفين راعي الايميل؟؟
ردت ساره: هيه ليش منو انت؟؟
رد عليها : انتي منو؟؟ ومن متى تعرفينه؟؟
ساره: انت منو؟ سعيد فيه شي؟؟
...: لا بس انا بنت مو ولد
ساره استغربت وقالت اكيد هاي تقربله.. سالتها: انتي تقربين له؟؟ ..
..: تقدرين تقولين جيه!!!!!.. ماعرفت شو ترد ساره كانت خايفه تبا تعرف منو هاي.. تمت ترمسها لين انصدمت ونزلت دمعتها.. معقوووله سعيد يسوي جيه وياي؟؟؟؟
وانا؟؟؟ وحبي له؟؟ و4 سنين اللي بينا؟؟؟ وين سارن؟؟؟؟؟؟؟؟.. ساره انصدمت يوم رمستها البنت وقالت لها انه هي تحبه من 3 سنين وهي اللي سرقت ايميله وحدرت منه.. بس خبرتها انه ساره مب اول بنيه تلقاها في ايميله في بعد بنيه بس يوم واجهته قال لها انه ربيعه يحدر من الايميل ويرمس بنات..!!
ساره متأكده انها ترمس سعيد وماترمس ربيعه..بس شكت في عمرها من كلام البنت.. بس تمت تخبرها عنه وعن طبعه نفس الشي ..معقووله اهو يجذب عليها عشان ماينفضح!! انقضت هالليله على ساره مثل الكابوس عمرها ماتوقعت انها بتنحط في مثل هالموقف.. وسعيد اللي مايخصه في البنات واللي كان يقوللها ماعنده وقت حق هالسوالف يطلع جيه!!!.. تمت تصيح ومب عارفه شوتسوي من قهرها..
ياخيتي ماصدق اسمع كلامج كيف؟؟؟
لو هو بعيد يروح باقي معاي طيف
يلعب علي شلوون؟؟ من قلبي حبيته
بعد تعب صياح وقهر رقدت ساره.. ونشت الظهر وهي بعدها مب قادره تصدق اللي صار حدرت المسن ولقت هاذيج البنت ظايفتنها من ايميلها.. تعرفن ع بعض وعرفت انه اسمها مريم وعمرها 21.. من قهر مريم سارت خبرته عن ساره وقال للها انه ساره تعرف ربيعه وربيعه مسافر..مريم شكت وشككت ساره وياها ساره مستحيل تغفي عن سعيد تعرفه وتعرف طبعه عدل.. قالن عشان يتأكدن اكثر مريم بدق حق سعيد وبتشبك ساره وياهم ع الخط..سعيد يوم عرف انه مريم بتسوي جيه حلف انه بيتم ساكت وعقب بيبند التلفون في ويهها.... احتارت مريم وماعرفت شوتسوي وخبرت ساره وتمن يفكرن بطريقه عشان يتاكدن اكثر...
شيعت جثمان حبك واعلنت الحداد~~
يت في بال ساره فكره..وعلى طول خبرت مريم انها يوم بترمسه في الفون تسجل صوته من أي فون ثاني.. وافقت مريم وعلى طول نفذت هالفكره.. طول الوقت كانت ساره تدعي انه مايطلع هووو.. لانها ماتبا تنصدم فيه..تمت خايفه وتحس الدقايق جنها ساعات تتريا بس مريم تحدر المسن واطرش التسجيل.. حدرت مريم وساره قلبها شوي وبيووقف .. طرشت مريم التسجيل.. ساره فجته بدت ادقق في الصووت.. : هو وربي هوو اعرف صوته واعرف اسلووبه في الكلام.. ماشي مجال نشك.. ساره ترد ع مريم وعيونها ادمع وماتبا تصدق اللي سمعته.. كيف طول هالفتره مايرد عليها ويرمس غيرها؟؟!! معقوله سعيد جيه يسوي؟؟!!
مريم واجهت سعيد وخبرته انه ساره سمعت صوته وعرفته.. انكر سعيد هالشي ومن عقبها قال حق مريم اذا انتي مب واثقه فيني لا ادقين واذا دقيتي مابرد عليج.. ويوم خبرت ساره باللي صار وياها اكتشفن انه نفس الاسلووب.. مريم عطت حق ساره رقم سعيد اللي ماتعرفه..ودقت له ولا رد عليها.. تمت اطرش مسجات.. ومايرد.. وعلى طول سار طرش حق مريم مسج يقوللها ليش توزعين ارقامي؟..ساره تقول بخاطرها: افا ياسعيد؟؟ الحين انا صرت الغريبه وماتبا ترمسني؟؟؟ عقب كل هالسنين وتنكرني؟؟ وربي اهون علي لو قلت حق مريم انا اعرفها بس ودرتها لاني ماباها ولا انك اتم ناكرني جيه وتشككني بعمري..
اللي صعق ساره اكثر وخلااها تنهار انه مريم خبرتها ملجت سعيد بتكون يوم الخميس.. مر عليها هاليووم جنه كابوس بالغصب استوعبت انه بيملج..
علمت قلبي نبض حبك وطاريك
وعلمت روحي كيف تنسا خطاياك
ليتك بعد علمتني كيف اخليك
وانساك في لحظه ولا اعيش ذكراك
عقب الملجه بيوم قررت ساره اطرش له مسج ومن عقب هالمسج بتحاول تشغل عمرها بأي شي عسب تنساه..
"ماسدك ودرتني طول هالفتره وبعد تنكر انك تعرفني واني احبك.. وربي ماسامحك طول عمري..نار تحرق قلبك مثل ماحرقت قلبي وزود"...
كان ها اخر مسج اطرشه ساره حق سعيد.. بس ليتها لو قدرت تنساه.. تذكره في كل شي في ظيجها وفي فرحها.. وفي رقادها.. عقب شهر ياها خبر انه بيعرس يوم اليمعه.. كانت تتمنى لو انها تسمع من اهلها انهم يعرفون حد بيعرس في هاليوم.. بس للاسف ماقدرت تعرف عنه أي شي ووين حتى عرسه..
قررت ساره تعيش حياتها بدون ماتذكره.. وتحاول ع قد ماتقدر انها تنساه.. بس امنيتها انها تشوفه في يوم وبس تساله ليش سووابها جيه؟؟.. لكنها وعدت عمرها في كل لحظه تذكره تقول حسبي الله عليك ياسعيد.... ومابتسامحه طول عمرها..رغم انه بيبقى غالي بقلبها وتذكره في كل حين وماتشوف الا دمعتها على خدها..بس وعدت عمرها انها ع قد ماتقدر تنساه وانها ماتجرب الحب مره ثانيه ..
مايخاف من الله اللي هجرني وراح مايخاف من الله
ياويله من الله قلبي ملاه جراح ياويله من الله
اقفى وخلااني عايش مع احزاني
الهم غطاني ولاني بعد مرتاح
الأربعاء فبراير 10, 2010 10:43 am